Өнгөрч буй долоо хоногийн үйл явдлуудаас олны анхаарал татсан нь Ерөнхийлөгчийн Тамгын газрын дарга асан, “Ачит ихт” компанийн хувьцаа эзэмшигч П.Цагааныг Сингапурт саатуулсан явдал байлаа.

Дээрх компаниас энэхүү мэдээллийг үгүйсгэсэн бол Хууль зүй, дотоод хэргийн сайд О.Алтангэрэл "П.Цагааныг Сингапурт саатуулсан нь үнэн" гэж энэ сарын 2-нд мэдээлсэн. Энэхүү баривчилгаа "Ачит ихт" компанийн 34 хувийг төр эзэмших гэсэн төлөвлөгөөтэй холбоотой байж болзошгүй аж.

Эх сурвалжийн мэдээлснээр, түүнийг “Эрдэнэт үйлдвэр”-ийн технологид тохирохгүй хаягдал хүдрийн үүсмэл ордын нөөцөд үйлдвэрлэлийн боловсруулалт хийж, катодын зэс үйлдвэрлэдэг "Ачит ихт" компанийн үйл ажиллагаатай холбогдуулан шалгах юм байна.

Мөн энэ долоо хоногийн онцлох үйл явдлын нэг нь төрийн байгууллагууд албан хэргээ кирилл болон үндэсний бичгээр хөтөлж эхэлсэн явдал байлаа.

Монгол хэлний тухай хууль 2015 онд батлагдсан. Энэ хуулийн нэг заалтыг арван жилийн дараа буюу 2025 оны нэгдүгээр сарын 1-нээс хэрэгжүүлэхээр тусгасан.

Хууль батлагдсанаас хойш бэлтгэл хангуулахаар хугацаа өгсөн энэ заалт "Төрийн захиргааны бүх шатны байгууллагууд албан хэргээ кирилл болон үндэсний бичгээр хослуулан хөтөлнө" гэсэн зохицуулалт юм.

Энэ заалтыг 2025 оны ажлын эхний өдөр буюу нэгдүгээр сарын 2-ны өдрөөс мөрдөж эхлэв.

Өнгөрч буй долоо хоногт 2024-2025 өвлийн оргил ачааллын үед цахилгааны хязгаарлалт хийхгүй байх боломж бүрдсэн нь онцлох үйл явдлын нэг байлаа.

Энэ станцыг хувийн хэвшлийн хөрөнгө оруулалтаар барьж буй билээ. Энэ оны эхний өдөр Бөөрөлжүүтийн цахилгаан станц 40МВт эрчим хүч нийлүүлсэн.

“Бодь интернэйшнл” группийн ТУЗ-ийн дарга Д.Баясгалан “Төсөлтэй холбоотой хоёр зүйлийг хүмүүст зориулж хэлэхийг хүсэж байна. Нэгдүгээрт, үнэ тарифыг 2016 оны Хөрөнгө оруулалтын гэрээ, Цахилгаан худалдах, худалдан авах гэрээнд тодорхой зааж өгсөн. Тэр гэрээнд эрчим хүчээ 28 жилийн турш нэг тарифаар нийлүүлнэ гэж заасан.

Тэр тариф ОХУ болон БНХАУ-аас худалдан авч буй тарифаас 30-35 хувиар хямд. Иймд төрөөс эрчим хүчний үнэ тарифыг нэмсэн нь манай станцын үйл ажиллагаатай ямар ч холбоогүй, олон жилийн өмнө шийдсэн асуудал” гэж онцолсон юм.

Бөөрөлжүүтийн цахилгаан станцын эхний 150 мВт блок ашиглалтад орж, туршилт тохируулгын ажил хийгдэж буй. Эхний хэсгийг төвийн системд холбож, энэ сарын 6-наас эрчим хүч нийлүүлж эхлэх талаар Эрчим хүчний сайд Б.Чойжилсүрэн мэдээлсэн.

Тэрбээр тус станцад ажиллаж, "2024-2025 оны өвлийн оргил ачааллын үе эхэлж, эрчим хүчний салбар өндөржүүлсэн бэлэн байдлын зэрэгт шилжиж, өнөөдрийн байдлаар бүх цахилгаан станц бүх хүчин чадлаараа ажиллаж байна.

"Бодь" группийнхэнд Эрчим хүчний сайдын хувьд талархал илэрхийлж байна. Эрчим хүчний чадлын дутагдлыг нөхөхөд үнэлж баршгүй хувь нэмэр оруулж байна. Том бүтээн байгуулалтын ард гарч байна.

Нэгдүгээр сарын 6-наас 150 мВт-ын бүрэн хүчин чадлаараа төвийн системд эрчим хүч нийлүүлнэ. Тиймээс цаашид цахилгаан хязгаарлахгүй. Бөөрөлжүүтийн цахилгаан станцын II блокийг ирэх жил арванхоёрдугаар сарын 1-нээс өмнө ашиглалтад оруулахаар төлөвлөж байгаа. III, IV блокийг 2027, 2028 онд ашиглалтад оруулахаар төлөвлөсөн. Нийт 600 мВт-ын хүчин чадалтай станц барих юм" гэсэн юм.

Б.ЖАРГАЛ