Хувь иргэн цацсан гэх бичлэгийг зарим нэр бүхий мэдээллийн сайтууд “Урд хөршөөс вагонд их хэмжээний бэлэн юанийн дэвсгэрт орж ирлээ. Эх сурвалж үүнийг сонгуульд зориулсан мөнгө гэв” гэх зэрэг гарчигтай нийтлэгдэв. Харин мэргэжлийн редакц бүхий eguur.mn, уг мэдээллийг тодруулахад гаалийн байгууллага нь “...Бичлэгийг шалгуулна, хилээр их хэмжээний юань орж ирсэн гэх мэдээлэл бүртгэгдээгүй” гэв. УИХ-ын сонгууль хаяанд ирсэн энэ үед үндэсний аюулгүй байдалтай холбоотой ийм асуудлыг зохих газраас нь шалгаж тогтоох нь ойлгомжтой. Гэтэл эл асуудлыг улс төржүүлэх зорилготой хуурамч хаягуудын жиргээ ч яваад амжив.

Сошиалаар нийгмийн сэтгэл зүйд нөлөөлөхөөр оролдсон байж болзошгүй уг их хэмжээний юанийн дэвсгэрт гэгчийг “УИХ-ын гишүүн А.Адъяасүрэн оруулж ирж нүүрсний хэргээ далдлах гэж байна” гэх мэдээлэл Твиттерт тархаж байтал гишүүн өөрөө уг мэдээллийг үгүйсгэж тэрхүү мэдээллийг бичсэн хүнийг олж өгсөн хүнд 5 сая төгрөг өгнө гэж бичив.

Төрийн тогтолцооны халдашгүй байдалтай холбоотой уг ноцтой мэдээллийг чухам хэн хаанаас ямар зорилгоор цацсан нь төдийлөн тодорхойгүй. Аль нэг улсын сонгуулийн үр дүнд мөнгөөр нөлөөлөх оролдлого байгаа бол тэр нь тухайн улсын тусгаар тогтнол, аюулгүй байдалтай шууд холбоотой, мэдээллийг нийтлэгч нь илтэд өдөөн турхирсан эсвэл сүрдүүлсэн агуулга илэрхийлсэн байж болзошгүй юу?

Д.ЭНХБАТ