Шинжлэх ухааны академийн ээлжит их чуулган болж, 2024 оны үйл ажиллагааны тайланг хэлэлцэв. Мөн ШУА-ийн Ерөнхийлөгч 100 хоногийн ажлын тайлангаа товч танилцуулсан байна.

Шинжлэх ухааны академийн ерөнхийлөгч С.Дэмбэрэл Монгол Улсын Засгийн газраас 2025-2028 онд хэрэгжүүлэхээр төлөвлөсөн 14 мега төсөл, Улаанбаатар хотын хэмжээнд хэрэгжүүлэх 23 мега төсөлд Эрдэм шинжилгээний хүрээлэн, эрдэмтэн судлаачдын оролцоог нэмэгдүүлэх чиглэлээр идэвхтэй ажиллаж байна. Тухайлбал,

“Эгийн голын усан цахилгаан станц” төсөлтэй холбоотой хоёр улсын эрдэмтдийн нэгдсэн дүгнэлт гаргахаар идэвхтэй ажиллаж байна. Орос, Монгол хоёр улсын Шинжлэх ухааны академийн эрдэмтэн судлаачдын хамтарсан ажлын хэсэг байгуулагдаж, анхны хуралдаанаа хэдхэн хоногийн өмнө Москва хотноо зохион байгууллаа.

Эхний хуралдаанаар “Эгийн голын голын усан цахилгаан станц” төсөлтэй холбоотой өнгөрсөн хугацаанд хийсэн байгаль орчны судалгаануудын үр дүнг хэлэлцлээ. Мөн цаашид зайлшгүй хийх шаардлагатай байгаа байгаль орчин, нийгмийн нөлөөллийн судалгааны ажлуудын хүрээг тодорхойлж, хамтран гүйцэтгэж, улмаар судалгааны үр дүнг 2026 оны эхний хагаст Монгол Улсын Засгийн газарт өргөн мэдүүлэхээр тохирлоо.

Хоёр орны эрдэмтэн судлаачдаас бүрдсэн мэргэжлийн баг байгуулагдаж, анх удаа уулзаж, асуудлууд дээр санал нэгдэж байгаа нь энэ төслийг амжилттай хэрэгжүүлэх үндэс болохыг хуралд оролцогчид тэмдэглэж, зайлшгүй хийх шаардлагатай байгаль орчин, нийгмийн нөлөөллийн судалгааны ажлыг ойрын хугацаанд хийж дуусгахаа мэдэгдсэн” гэж хэлжээ.

Эрдэмтэд сансрын хиймэл дагуулын мега төслийн ажил Монгол Улсад үр өгөөжөө өгнө гэж үзэж байгаа аж. Энэ тухай С.Дэмбэрэл танилцуулахдаа “ШУА-ийн болон их, дээд сургуулийн эрдэмтэн профессор, төр, хувийн хэвшлийн бүх төлөөллийг оролцуулсан хэлэлцүүлгийг ШУА дээр зохион байгуулж, зөвлөмжөө холбогдох газруудад хүргүүлээд байна.

Шинжлэх ухаан, технологийн өндөр өгөөжтэй энэ төслийг эхлүүлэх хэрэгцээ бий. Энэ нь зөвхөн холбооны хиймэл дагуул биш, зайнаас танадан судлах хиймэл дагуул, судалгааны хиймэл дагуул зэргийг хөгжүүлэх, хиймэл дагуулын техник технологийг Монголдоо нутагшуулах, цаашид өөрсдөө хөгжүүлэх эхлэлийг тавина гэсэн агуулгатай зөвлөмжийг Засгийн газарт хүргүүллээ.

Мөн ураны ашиглалтын асуудлаар шинжлэх ухааны эрдэмтэн судлаачид өөрсдийн хийсэн судалгааны ажлын дүнгээ олон нийтэд танилцуулсан. Энэ чиглэлээр санал бодлоо илэрхийлэх нээлттэй хэлэлцүүлгийг ШУА дээр зохион байгууллаа.

Хэлэлцүүлгээр Монгол Улсад ирэх ашгаас гадна шинжлэх ухааны байгууллага, эрдэмтэн судлаачид төсөл хэрэгжихэд ямар хяналт мониторинг хийх, аюулгүй байдлыг хэрхэн хангах талаар танилцууллаа.” гэжээ.

Б.ЖАРГАЛ