Нийслэлийн прокурорын газраас “MCS” группын Хамгаалалтын албаны дарга З.Төрмандахад эрүүгийн хэрэг үүсгэн, яллагдагчаар татах санал ирүүлжээ. Тодруулбал,

Нийслэлийн прокурор “З.Төрмандах нь төрийн нууцад хамаарах мэдээ, баримт, эд зүйлсийг хулгайлсан, цуглуулсан, хадгалсан”, “Гүйцэтгэх ажил явуулах эрхгүй этгээд гүйцэтгэх ажил явуулсан, эсхүл гүйцэтгэх ажлын тусгай техник олж авсан, ашигласан, борлуулсан” гэмт хэрэгт холбогдуулан яллагдагчаар татсан.

Яллагдагч нь “гэмт хэргийн ул мөр, эд мөрийн баримт, нотлох баримтыг устгах, өөрчлөх, зөөвөрлөх, нуун далдлах, үрэгдүүлэх, хуурамчаар үйлдэх, гэмт хэрэг үйлдэх, гэмт хэргээ төгсгөх үндэслэл бүхий баримт, мэдээлэл байгаа...” гэх үндэслэлээр цагдан хорих таслан сэргийлэх арга хэмжээ авах тухай" санал ирүүлжээ.

Дүүргийн Эрүү, Иргэний хэргийн хялбар ажиллагааны анхан шатны тойргийн шүүх прокурорын саналыг хүлээн авч, хоёрдугаар сарын 19-ний өдөр хүлээн авч, хянан хэлэлцсэн байна.

Шүүх хэргийн материалд цугларсан нотлох баримтууд, шүүхийн хэлэлцүүлэгт гаргасан прокурорын санал, яллагдагчийн өмгөөлөгч нарын тайлбар зэрэгтэй танилцан яллагдагч З.Төрмандахыг хоёрдугаар сарын 19-ний өдрөөс цагдан хорих таслан сэргийлэх арга хэмжээ авч шийдвэрлэжээ.

МCS групп “М Армор” ХХК гэх харуул, хамгаалалтын компанитай. Тус группийн Захирлуудын зөвлөлийн дарга Ж.Оджаргал З.Төрмандахыг хамгаалалтын албаны даргаараа ажиллуулаад уджээ. З.Төрмандахын хамт тус байгууллагын дөрвөн ажилтныг ч мөн саатуулсан талаар эх сурвалж мэдээлэв.

З.Төрмандах нь зургаан сараас гурван жил хүртэлх хугацаагаар хорих ялтай зүйл ангиар шалгагдаж буй юм бана.

Эрүүгийн хуулийн 19.11 дүгээр зүйл, 21.13 дугаар зүйлээр шалгагдаж 19.11 дүгээр зүйл.

Төрийн нууцыг хууль бусаар олж авах

1.Төрийн нууцад хамаарах мэдээ, баримт, эд зүйлсийг хулгайлсан, цуглуулсан, хадгалсан нь эх орноосоо урвах, тагнуул хийх гэмт хэргийн шинжгүй бол зургаан сараас гурван жил хүртэл хугацаагаар зорчих эрхийг хязгаарлах, эсхүл зургаан сараас гурван жил хүртэл хугацаагаар хорих ял шийтгэнэ.

21.13 дугаар зүйл.Гүйцэтгэх ажлын тухай хууль зөрчих

2.Гүйцэтгэх ажил явуулах эрхгүй этгээд гүйцэтгэх ажил явуулсан, эсхүл гүйцэтгэх ажлын тусгай техник олж авсан, ашигласан, борлуулсан бол хоёр мянга долоон зуун нэгжээс арван дөрвөн мянган нэгжтэй тэнцэх хэмжээний төгрөгөөр торгох, эсхүл зургаан сараас гурван жил хүртэл хугацаагаар хорих ял шийтгэнэ.

Б.ЖАРГАЛ