Монголын Морин Спорт, Уяачдын Холбоо (ММСУХ)-ны VIII Их хурал “УЛАМЖЛАЛТ-ШИНЭЧЛЭЛ-ХАРИУЦЛАГА” уриатайгаар Улаанбаатар хотод өнөөдөр буюу 2024 оны 12 дугаар сарын 02-ны өдөр Төрийн ордны “Их Монгол” танхимд зохион байгуулагдана. Энэхүү хурлаар тус холбооны Ерөнхийлөгчийг сонгох юм.

ММСУХ-ны Ерөнхийлөгчид Монгол Улсын Тод манлай уяач П.Энхмөнх, Монгол Улсын Тод манлай уяач Д.Дагвадорж, ММСУХ-ны Ерөнхийлөгчийн үүрэг гүйцэтгэгч Б.Нямжав нар нэр дэвшжээ.

Тус холбооны ээлжит их хурал өглөө 08.30 цагт эхлэв.

ММСУХ-ны Удирдах ажилтны VI зөвлөгөөн 2024 оны арваннэгдүгээр сарын 24-ний өдөр "Улаанбаатар" зочид буудлын "Сонгинохайрхан" танхимд болсон байна.

Зөвлөгөөнд Ажлын алба, салбар холбооны Тэргүүн, нарийн бичгийн дарга нар, ХГБХХЕГ-ын төлөөлөл, ХХААХҮ яамны төлөөлөл болон ММСУХ-ны VIII Их хурлыг зохион байгуулах ажлын хэсгүүд оролцож Холбооны ажлын тайлан, Холбооны дүрмийн хэрэгжилт, нэмэлт өөрчлөлтөд санал авах, Салбар холбооны жишиг журам, Хурдан морь уралдаанч хүүхдийн эрх, аюулгүй байдал, Монгол үүлдрийн адууны онцлог, Хурдан морины уралдааны дүрмийн хэрэгжилт, нэмэлт өөрчлөлт, Хаврын морин уралдааныг сэргээх зэрэг сэдвүүдээр сонирхолтой хэлэлцүүлэг өрнүүлжээ.

Энэ үеэр ММСУХ-ны Ерөнхийлөгчид нэр дэвшигчид мөрийн хөтөлбөрөө танилцуулсан байна.

Б.ЖАРГАЛ