Олон улсын эрүүгийн шүүх Израилын Ерөнхий сайд Биньямин Нетаньяху, Батлан хамгаалахын сайд асан Йоав Галант нарыг баривчлах тушаал гаргажээ.

Тус шүүх мэдэгдэлдtt “Олон улсын эрүүгийн шүүхийн Урьдчилсан шатны шүүх танхимаас Бенжамин Нетаньяху, Йоав Галант нарыг 2023 оны аравдугаар сарын 8-наас 2024 оны тавдугаар сарын 20-ныг хүртэл Газын зурваст хүмүүнлэг ёсны эсрэг гэмт хэрэг болон дайны гэмт хэрэг үйлдсэн хэргээр баривчлахыг зөвшөөрлөө" гэж дурджээ.

Энэхүү шийдвэр гарахын өмнө тус шүүх уг асуудлыг хэлэлцэх эрхгүй гэж үзсэн Израилын талын эсэргүүцлийг хүлээж аваагүй байна.

Нетаньяху Олон улсын эрүүгийн шүүхийн баривчлах шийдвэрийг "утгагүй бөгөөд бодит байдлыг мушгин гуйвуулсан" гэж мэдэгджээ. Шүүх өөр ямар ч ардчилсан улсад “ийм нэг талыг барьсан байдлаар” хандаж байгаагүй бөгөөд Израил улс хууль дээдлэх зарчмыг баримталсаар байх болно гэж мэдэгдсэн байна.

Галант Израил улс Газын зурваст цэргийн ажиллагаа явуулж эхэлснээс хойш ажиллагааг удирдсан гол хүн юм. Гэвч Нетаньяху хэт барууны үзэлтнүүд олонх болж буй тус улсын одоогийн Засгийн газрын гишүүдээс “аядуу үзэлт” гэгддэг Галантыг энэ сарын 5-ны өдөр албан тушаалаас нь огцруулсан.

Ерөнхий сайдын ажлын алба мэдэгдсэнээр, тэдний хооронд "итгэлцлийн хямрал" үүссэн нь түүнийг огцруулах шалтгаан болжээ.

Израилын Ерөнхийлөгч Ицхак Херцог Олон улсын эрүүгийн шүүхийн шийдвэрийг "утгагүй" гэж мэдэгдсэн байна.

Эх сурвалж: CNN, ANADOLU
Б.ЖАРГАЛ