Садар самуунаас эхлээд хэрцгийлэл, зодоон цохион, элдэв сугалаа гэх луйврын шинжтэй үйлдлүүд, хуурамч бараа сурталчилгаа гэх мэтийн илтэд хууль зөрчсөн үйлдлүүдэд анхаарал хандуулах цаг болжээ. Ялангуяа нийгмийн сүлжээг далимдуулан олон нийтийн оюун санаанд элдэв төрлийн хорт үр үндэс нутагшуулахаар оролдох үйлдлүүд нэлээд ажиглагдаж байгааг холбогдох байгууллагууд анхааралдаа авч ажиллах нь ойлгомжтой ч Монголчуудын уламжлалт үнэт зүйлийг гутаах хандлага зориудын үйлдлүүдээр турхирах маягаар орж ирэх болсныг бас хэлэхэд илүүдэх юун.

Хаа хаанаа хууль ёс, шударга зарчим, үнэт зүйлсээ хамгаалах цаг болжээ. Аль нэг газрын дарга сэтэртнүүд дураараа дургиж, дунд чөмгөөрөө жиргэн буй бичлэг нь олон нийтийн сүлжээнд илчлэгдэж тэдгээр хүмүүс хариуцлага хүлээж буй үйлдлээ ажлаасаа халагдах төдийхнөөр дуусгавар болгох нь олон нийтийн дунд буруу үйлдлийг өөхшүүлээд өнгөрүүлэх шахам хэрэг гэж үзэх тохиолдлууд байсаар.

Нэгэнт цахим орчин, нийгмийн сүлжээний анхаарлаас далдуур өнгөрөөгүй гэмт хэргийн шинжтэй үйлдлүүдэд хуулийн хариуцлага хүлээлгэхдээ асуудлыг мөн олон нийтийн мэдэх эрхийн хүрээнд нээлттэй явуулах зарим талын нягт үйл ажиллагаа үгүйлэгдэн буй нь магадтайг олон нийтийн сүлжээн дэх уур амьсгалаас ажиглаж болохоор. Бас цахим орчны хэт их хөөрүү, эрсдэлтэй хуйсгануур байдалд дулдуйдан нэгнээ элдвээр дайрах, үндэслэлгүйгээр гүтгэх, гутаан доромжлох үйлдэлд тодорхой зохицуулалтын нарийвчилсан алхам хэрэгтэйг онцлохгүй орхиж боломгүй.

Д.ЭНХБАТ