АНУ-ын Төрийн нарийн бичгийн дарга Марко Рубио “Украины мөргөлдөөн нь АНУ, ОХУ-ын хооронд өрнөж буй дайн” хэмээн хүлээн зөвшөөрчээ.

Америкийн гадаад бодлогын газрын дарга “Fox News” телевизээр ярилцлагадаа "Ний нуугүй хэлэхэд, энэ бол Украинд тусалж буй АНУ ба Орос хэмээх хоёр цөмийн гүрний хоорондох прокси дайн. Ерөнхийлөгч Трамп үүнийг сунжирсан, мухардмал мөргөлдөөн гэж үзэж буй" хэмээн хэлсэн байна.

Өмнө нь Лондон дахь ОХУ-ын Элчин сайд Андрей Келин “BBC” агентлагт ярилцлага өгөхдөө “Их Британийг Оросын эсрэг прокси дайн хийж байна” гэж буруутгаж байсныг “The Guardian” уламжилж байв.

Прокси дайн гэдэг нь аливаа улс гуравдагч орнуудын дайнд шууд, эсвэл шууд бусаар тусалж, стратегийн ашиг сонирхлоо хамгаалж, эсвэл дайснаа дарж авах үйлдлийг хэлдэг.

Эх сурвалж: TASS
Б.ЖАРГАЛ