Байгал нуурын гол цутгал болох Сэлэнгэ мөрний усны түвшин нэг өдрийн дотор 13 см нэмэгдэж, 125 см хүрсэн тухай ОХУ-ын Буриадын Ус цаг уур, орчны хяналтын төвөөс мэдээлэв. Өвөл хуримтлагдсан их хэмжээний цас мөс хайлж Сэлэнгэ мөрөнд мөсний бөглөрөл үүссэн нь усны түвшин нэмэгдэх гол шалтгаан болж буй.

Иволгинский дүүрэгт шар усны үер буусны улмаас 11 айлын сууц усанд автаж, 22 хүнийг нүүлгэн шилжүүлээд байна. Мөн Улаан-Үд хотын нутаг дэвсгэрт 35 айлын талбай, хоёр орон сууцны барилга усанд автжээ.

Буриадын Зүүн цэргийн тойрог, Онцгой байдлын яамны саперчид голын ёроолыг мөснөөс чөлөөлөхийн тулд дэлбэрэлт хийхээр төлөвлөж байна.