Төв аймгийн Сүмбэр сумын ерөнхий боловсролын сургуулийн сурагчид сүрьеэ өвчнөөр өвчилсөн талаар тус сумын иргэд Эрүүл мэндийн яамны /ЭМЯ/ гадна мэдээлэл хийлээ. Улмаар Эрүүл мэндийн сайд Д.Сарангэрэлийг огцрохыг шаардаж байлаа.

-СҮМБЭР СУМЫН СУРГУУЛИЙН 288 ХҮҮХДЭЭС 197 НЬ СҮРЬЕЭТЭЙ ГЭВ-

Энэ үеэр тус сургуулийн бага ангийн багш Б.Болорцэцэг “Манай сургууль 300 гаруй хүүхэдтэй. Үүнээс сүрьеэ өвчний халдвар авсан 200-аад хүүхэд, халдвартай гэдэг нь тогтоогдсон зургаан хүүхэд байна. Халдвартай гэдэг нь тогтоогдсон зургаан хүүхэд эмнэлэгт хэвтэн эмчлүүлж байна. Би сүрьеэ өвчин туссан гэдгээ эрт мэдээд ажлаа хүлээлгэж өгсөн. Гэхдээ нийгмийн хандлага яагаад заавал багшийг буруутгаад байгааг ойлгохгүй байна. Багш хүүхдээс аль эсвэл хүүхдүүдийн эцэг эхээс авсан байхыг үгүйсгэхгүй. Би эмчлүүлээд, эмнэлгээс хоёр долоо хоногийн өмнө гарсан. Зургаан сар эм уухаас гурав дахь сар дээрээ явж байна. Одоо би халдваргүй. Халдвартай байсан бол эмнэлгээс гаргахгүй байсан. Бүрэн эдгэрч дууссаныхаа дараа ажилдаа эргээд орно. Өвчнөө эрт үед нь илрүүлээд эмчлүүлж байгаа хүнийг нийгмээрээ гадуурхах хандлага их ажиглагдаж байна" гэлээ.

Ж.АМАРСАНАА: СҮРЬЕЭ ТАРХСАН НЬ БАГШ, ЭМЧ НАРЫН БУРУУ БИШ, БОДЛОГЫН АЛДАА

Мөн жагсаалын үеэр зохион байгуулагчдын төлөөлөл болох Эрүүл мэндийн дэд сайд асан Ж.Амарсанаатай цөөн хором ярилцлаа.

Сайд та бүхнийг хүлээж авсангүй юу?

Жагсаалд 200-300-аад иргэн оролцож байна. Сүмбэр сумын ард иргэд, халдвар авсан хүүхдүүийн эцэг эхчүүд, багш нарын төлөөлөл оролцож байна. Эрүүл мэндийн яам хаалга үүдээ онгойлгохгүй байна. Энэ холоос ирсэн эцэг эхчүүдийн төлөөллийг салбарын сайд, дэд сайдтай л уулзуулъя гэж бодсон юм л даа. Харамсалтай нь хаалгаа онгойлгосонгүй.

Сүмбэр суманд нөхцөл байдал ямар байгаа юм бэ?

Өнөөдөр Сүмбэр суманд 288 хүүхэд сурч байгаагаас 197 хүүхэд сүрьеэтэй гэж тодорхойлогдсон. Тэднээс идэвхитэй сүрьеэтэй 32-34 хүүхэд байна. Эмнэлэгт хэвтэж байгаа зургаан хүүхэд байна. Багш нарын дотор халдвар авсан нэг багш байгаа. Гэхдээ харамсалтай нь халдвар авсан багшийг маш их буруугаар дайрч доромжилж байгаа. Аль дээр үед буюу 2016 онд олон улсын судалгаагаар сургуулийн насны хүүхдүүдийн аравны нэг нь далд сүрьеэтэй байна гэсэн мэдээлэл гарчихсан байсан. Гэтэл тэр багшийг сургуулийн сурагчдыг тэр аяар нь сүрьеэтэй болгочихсон юм шиг буруу яриа яваад байгаа нь харамсалтай. Энэ бол бодлогын алдаа байсан юм. Түүнээс багш нарын буруу биш. Эмч нарын ч буруу биш. Цэвэр бодлогын алдаа гэж харж байгаа. Бодлогын төв байгуулага чинь эрүүл мэндийн яам шүү дээ.

Та дэд сайд хийж байсан хүн шүү дээ. Сайд хийж байхдаа яагаад бодлого боловсруулаагүй юм бэ?

Намайг дэд сайд хийж байхад ингэж их дэгдэлд гардаггүй байсан. Тэр үед Монгол улсад тандалтын судалгаа хийгдээгүй байсан. Харин би тэр тандалтын судалгаа хийх мөнгийг нь тавьж өгсөн. Түүний ачаар тандалт хийгээд, үр дүн нь 2016 онд гарсан. Тодруулбал 100 мянган хүн ам тутамд 567 хүн сүрьеэтэй юм байна гэсэн судалгааны үр дүн гарсан. Дараа нь харвардын их сургуультай хамтарсан судлагаа хийгдсэн. Харвардын их сургууль хүүхдүүд дээр судалгаа хийсэн. Сургуулийн насны 9000 хүүхдэд судалгаа хийж үзэхэд арван хүүхдийн нэг нь буюу арван хувь нь далд сүрьеэтэй байна гэсэн судалгааны хариу гарсан. Гэтэл 2016 оноос хойш арга хэмжээ авахгүй, далд сүрьеэгээ эмчлэхгүй байсаар байж одоо дэгдэлт, тахлын хэмжээнд хүрлээ.

Одоо тэгээд ямар бодлого барьж ажиллах ёстой гэж та үзэж байна вэ?

Одоо ерөөсөө Монголын бүх сурагчдад шинжилгээ хийх хэрэгтэй. Тэр дотроос далд сүрьеэтэй хүүхдүүдээ бүгдийг нь илрүүл. Илрүүлсэн хүүхдүүдээ дахин баталгаажуул. Баталгаажуулсныхаа дараа шууд эмчилгээнд хамруул. Тэгээд гүйцээ. Улс орон ухаантай юм бол мөнгө гаргаад бүх асуудлыг шийдэх хэрэгтэй. Зам харгуй, дэд бүтцэд зөндөө мөнгө зарцуулж байна шүү дээ. Тэрнхийхээ өчүүхэн хэсгийг эрүүл мэнддээ зарцуулчих хэрэгтэй. Шадар сайдад гамшгийн үед хэрэглэх нөөц мөнгө байгаа. Тэр мөнгөө гарга л даа. Бүр болохгүй бол Монгол банкнаасаа мөнгөө хэвлэ л дээ. Бушуу асуудлаа шийд л дээ. Өөр асуудал байхгүй.

Сайдыг огцруулаад яах юм. Өвчнийг улс төржүүлэлт болгоод байна гэж харах хүмүүс бас их байна?

Үнэхээр мэргэжлийн сайд байсан бол өдий хэмжээнд хүрэх байсан уу үгүй юу гэдгийг бодож үзээрэй. Салбарын сайдыг томилогдох үед би зөвлөмж гаргаж өгсөн. Сургуулийн насны хүүхдүүдэд сүрьеэгийн халдвар өндөр байна. Сүрьеэ рүү анхаарлаа хандуулаарай гээд бичсэн байдаг. Гэтэл энэ асуудал дарагдсаар, даравч далдайна гэгчээр одоо гарч ирлээ. Ганцхан сургуулийн асуудал биш. Нийслэлд хоёр сургууль, орон нутагт нэг сургуульд ил боллоо. Цаана нь хэд байгаа юм бүү мэд.

Б.БУРМАА