2024 оныг миний хувьд “Зорилго” гэдэг үгээр тодорхойлсон. Экспортыг нэмэгдүүлэн, төрөлжүүлэх зорилтыг дэвшүүлж, дэлхийн зах зээлийг монголчууддаа бэлтгэх ажилд хүчээ гаргалаа.

Мөн Монголын эдийн засгийг сууриар нь өөрчлөх бодлогыг батлах нь хамгийн том зорилт байсан. Энэ хүрээнд хамтарсан засаг УИХ-аар 14 мега төслийг батлуулж, эдгээр 14 төслөөс дөрөв нь хэрэгжиж эхэлсэн том амжилттай хуучин оноо үдэж байна.

Энэ мэт том зорилгын төлөө бид нэгдмэл байж чадсан. Энэ нэгдмэл байдал цаашдаа улам том хөгжлийн итгэлийг авчирна гэдэгт эргэлзэхгүй байна. Тийм учраас 2025 оныг би “Итгэл” гэдэг үгээр тодорхойллоо.

Бид хөгжиж чадна, бид үйлдвэрлэж чадна, бид экспортолж чадна гэдгээ ирэх жилүүдэд батлан харуулна.

Эцэст нь онцгойлон хэлэхэд, томоохон төслүүдээ хөдөлгөснөөр 2027 он гэхэд түгжрэлгүй болох, гамшиг болоод байгаа утааны асуудлыг бүрэн шийдэж чадна гэдэг итгэл бидэнд байна.

2025 онд Монголын маань иргэд чанга, цэх алхсан итгэл дүүрэн жил байгаасай хэмээн хүсэн ерөөе. Та бүхэнд шинэ жилийн баярын мэнд хүргэе.

Монгол Улсын Тэргүүн шадар сайд бөгөөд Эдийн засаг, хөгжлийн сайд
Ардчилсан намын дарга